کراچی : شہر قائد میں آئندہ ہفتے سے ڈبل ڈیکر اور ای وی بسیں چلانے کا اعلان کردیا گیا جبکہ پیپلزبس سروس کے نئے روٹس شروع کرنے کا اعلان کیا گیا۔
تفصیلات کے مطابق سندھ کے سینئر وزیر شرجیل انعام میمن کی زیر صدارت ٹرانسپورٹ کے حوالے سے اجلاس ہوا، جس میں کراچی میں ڈبل ڈیکر بسیں اور نئی ای وی بسیں چلانے کے منصوبے کی منظوری دی گئی۔
اجلاس میں سیکریٹری ٹرانسپورٹ، ایم ڈی ایس ایم ٹی اے، سی ای او ٹرانس کراچی اور یلو لائن بی آر ٹی کے پی ڈی شریک ہوئے۔
شرجیل میمن کو یلو لائن بی آر ٹی اور ریڈ لائن بی آر ٹی کے ترقیاتی کام میں پیشرفت پر بریفنگ دی گئی۔
شرجیل میمن نے کہا کہ امید ہے ڈبل ڈیکر بسیں اور نئی ای وی بسیں آئندہ ہفتے تک کراچی پہنچ جائیں گی، ڈبل ڈیکر کاروٹ کے آغاز کے ساتھ ای وی بسز کے نئے روٹس بھی شروع کیے جائیں گے۔
انہوں نے بتایا کہ دسمبر تک ای وی ٹیکسی سروس شروع کرنے اور موجودہ مالی سال میں مزید 500 بسیں لانے کا ارادہ ہے، سندھ کے دیگر اضلاع میں پیپلز بس سروس کے نئے روٹس بھی جلد متعارف کروائے جائیں گے۔صوبائی وزیر نے ٹرانسپورٹ حکام کو نئے روٹس کی آپریشنل تیاریاں مکمل کرنے کی ہدایات دی ہیں۔
اجلاس میں ڈویژنل ہیڈکوارٹرز میں خواتین اور طالبات کو اسکوٹیز چلانے کی تربیت دینے کے سلسلے کا آغاز بھی بتایا گیا، یلو لائن بی آر ٹی پر شب و روز کام جاری ہے اور تاج حیدر پل کے دوسرے حصے کا کام جلد شروع کیا جائے گا جبکہ پل پر دو طرفہ ٹریفک آج سے چلائی جا رہی ہے۔
شہر قائد میں آئندہ ہفتے سے ڈبل ڈیکر اور ای وی بسیں چلانے کا اعلان
