امریکی کمپنی نے پاکستان میں ملین ڈالر کی سرمایہ کاری کا اعلان کردیا

اسلام آباد : امریکی کمپنی نے پاکستان میں 500 ملین ڈالر کی سرمایہ کاری کا اعلان کردیا، جو معدنیات کے شعبے کے لیے ایک بڑی پیش رفت ہے۔
تفصیلات کے مطابق پاکستانی منرلز کمپنی اور ایک امریکی کمپنی کے درمیان زیرِ زمین معدنیات اور قیمتی دھاتوں کے شعبے میں تعاون کے لیے مفاہمت کی یادداشت (ایم او یو) پر دستخط کر دیے گئے، دستخطوں کی یہ تقریب فیڈریشن ہاؤس ہیڈ آفس کراچی میں منعقد ہوئی۔
پاکستانی کمپنی کے چیئرمین حنیف گوہر نے بتایا کہ امریکی کمپنی پاکستان میں 500 ملین ڈالر کی سرمایہ کاری کرے گی، جو معدنیات کے شعبے کے لیے ایک بڑی پیش رفت ہے۔
امریکی کمپنی کے سی ای او کرسٹوفر گیرسٹین کا کہنا تھا کہ وہ گزشتہ 30 سال سے معدنیات کے شعبے سے وابستہ ہیں اور پاکستان میں موجود مواقع ان کے لیے خصوصی اہمیت رکھتے ہیں۔
چیئرمین پاکستانی کمپنی نے بتایا کہ معاہدے کے تحت پاکستانی نوجوانوں کو امریکہ بھیج کر معدنیات کے شعبے میں خصوصی تربیت فراہم کی جائے گی، جس سے ملکی افرادی قوت کو جدید مہارتیں ملیں گی۔
پاکستانی کمپنی کے سی ای او کا مزید کہنا تھا کہ ملکی اسٹاک میں موجود قیمتی دھاتیں جلد امریکہ ایکسپورٹ کی جائیں گی، جس سے ملک کی برآمدات میں اضافہ متوقع ہے۔
انہوں نے مزید کہا کہ یہ معاہدہ پاکستان میں غیر ملکی سرمایہ کاری کے فروغ کا باعث بنے گا اور معاشی سرگرمیوں میں مثبت اضافہ کرے گا۔