وفاقی وزیر صحت مصطفٰی کمال نے کہا ہے کہ پاکستان میں 70 فیصد بیماریوں کی بنیادی وجہ آلودہ پانی ہے۔ انہوں نے بتایا کہ ملک میں ہرسال اتنی آبادی بڑھ رہی ہے جتنی نیوزی لینڈ میں ہے، لیکن صحت کی سہولیات اس بڑھتی ہوئی آبادی کے مطابق نہیں ہیں۔
اسلام آباد میں لائف اسٹائل میڈیسن کی افتتاحی تقریب سے خطاب کرتے ہوئے انہوں نے کہا کہ اگر پمز اسپتال جائیں تو وہاں دیکھنے میں آتا ہے کہ کوئی سیاسی جلسہ ختم ہوا ہے، کیونکہ ایک ڈاکٹر تقریباً 200 مریضوں کو دیکھ رہا ہوتا ہے۔
وزیر صحت نے کہا کہ ملک میں پرائمری اور سیکنڈری اسپتالوں کی کمی ہے اور موجودہ ہیلتھ کیئر سسٹم خستہ حال ہے، جس کی وجہ سے ہر بیمار شخص کا مناسب علاج ممکن نہیں ہو پا رہا۔
