کراچی: کمشنر کراچی کی ہدایت پر ضلعی انتظامیہ نے شہر بھر میں تجاوزات اور ٹریفک کی روانی میں رکاوٹ بننے والے عناصر کے خلاف بڑے پیمانے پر کارروائیاں کرتے ہوئے مختلف علاقوں سے غیر قانونی تجاوزات کا خاتمہ کیا ہے۔
ضلعی انتظامیہ کے مطابق صدر کے علاقے داؤد پوتہ روڈ پر سڑک اور فٹ پاتھ پر تجاوزات قائم کرنے پر 13 ہوٹل سیل کر دیے گئے۔ حکام کا کہنا ہے کہ ہوٹل مالکان نے کرسیاں اور دیگر سامان سڑک اور فٹ پاتھ پر رکھ کر عوام کی آمد و رفت اور ٹریفک کی روانی متاثر کر رکھی تھی۔
انتظامیہ نے نمائش سے گرومندر تک روڈ کے اطراف قائم تمام تجاوزات بھی ہٹا دی ہیں۔ اس کے علاوہ عالمگیر روڈ، شہید ملت روڈ اور ماڈل کالونی میں لیاقت علی خان روڈ پر بھی آپریشن کرتے ہوئے سڑکوں کو تجاوزات سے پاک کر دیا گیا۔
کمشنر کراچی نے شہر کے تمام ڈپٹی کمشنرز کو ہدایت کی ہے کہ اپنے اپنے اضلاع میں ٹریفک کی روانی میں رکاوٹ بننے والی تمام تجاوزات کے خلاف بلاامتیاز کارروائیاں جاری رکھیں اور عوام کو بہتر سفری سہولیات فراہم کرنے کے لیے سڑکوں کو ہر صورت صاف رکھا جائے۔
