ملتان: شیر شاہ پل کے قریب کراچی سے پشاور جانے والی رحمان بابا ایکسپریس کے حادثے کے بعد ریسکیو آپریشن مکمل کرلیا گیا ہے، جبکہ حادثے میں 6 افراد کے جاں بحق اور 30 سے زائد کے زخمی ہونے کی تصدیق ہوئی ہے۔
تفصیلات کے مطابق رحمان بابا ایکسپریس کی تمام 15 بوگیاں ملتان میں شیر شاہ پل کے قریب پٹری سے اتر گئیں۔ حادثے کے بعد ریسکیو ٹیموں نے امدادی کارروائیاں شروع کیں اور متاثرہ بوگی سے ایک اور لاش نکالے جانے کے بعد ہلاکتوں کی تعداد 6 ہوگئی۔
ریسکیو حکام کے مطابق تمام لاشوں اور زخمیوں کو نشتر اسپتال منتقل کردیا گیا ہے، جہاں ایمرجنسی نافذ کردی گئی۔ حادثے کے بعد ڈیڑھ سالہ بچی بھی لاپتا ہے، جس کی تلاش جاری ہے۔
ایک مسافر کے مطابق حادثہ صبح تقریباً 5 بج کر 15 منٹ پر پیش آیا۔ مسافر نے دعویٰ کیا کہ روہڑی کے قریب ٹرین کی نویں بوگی کے نٹ بولٹ درست کیے گئے تھے۔ تاہم حادثے کی حتمی وجہ تاحال سامنے نہیں آئی۔
ڈی ایس ریلوے کے مطابق حادثے کی وجوہات کے بارے میں فی الحال کچھ کہنا قبل از وقت ہے۔ واقعے کی تحقیقات کے لیے کمیٹی کام کر رہی ہے اور شواہد جمع کیے جا رہے ہیں۔ حکام نے ڈاؤن ٹریک 3 سے 4 گھنٹے میں بحال کرنے کی توقع ظاہر کی ہے۔
ریلوے حکام کے مطابق متاثرہ ٹرین کے مسافروں کو ریلوے اسٹیشن منتقل کرنے کے لیے متبادل کوچ فراہم کردی گئی ہے۔
