واشنگٹن: امریکا نے مشرقِ وسطیٰ میں بڑھتی ہوئی کشیدگی اور سکیورٹی خدشات کے پیشِ نظر اپنے شہریوں کے لیے عالمی سفری انتباہ جاری کرتے ہوئے خطے کا غیر ضروری سفر نہ کرنے کی ہدایت کی ہے۔
امریکی محکمہ خارجہ کے مطابق مشرقِ وسطیٰ کی موجودہ سکیورٹی صورتحال غیر یقینی ہے اور کسی بھی وقت حالات مزید کشیدہ ہو سکتے ہیں، اسی لیے شہریوں کو خطے کے سفر سے حتی الامکان گریز کرنے کا مشورہ دیا گیا ہے۔
محکمہ خارجہ نے مشرقِ وسطیٰ میں موجود امریکی شہریوں کو بھی محتاط رہنے، مقامی حالات پر مسلسل نظر رکھنے اور امریکی سفارت خانوں، قونصل خانوں اور مقامی حکام کی ہدایات پر عمل کرنے کی تلقین کی ہے۔
بیان میں کہا گیا ہے کہ خطے میں جاری کشیدگی کے باعث پروازوں کی منسوخی، فضائی حدود کی عارضی بندش اور دیگر سفری رکاوٹوں کا سامنا کرنا پڑ سکتا ہے، جس سے بین الاقوامی فضائی آپریشن متاثر ہونے کا خدشہ ہے۔
امریکی حکام کے مطابق کئی ایئرلائنز نے بعض روٹس پر پروازوں کی بحالی مؤخر کر دی ہے، جبکہ متعدد پروازیں مکمل طور پر منسوخ بھی کی جا چکی ہیں۔
محکمہ خارجہ نے شہریوں کو ہدایت کی ہے کہ سفر سے قبل اپنی ایئرلائن سے پرواز کی تازہ صورتحال ضرور معلوم کریں، غیر ضروری سفر سے اجتناب کریں اور ہنگامی حالات کے لیے متبادل سفری منصوبہ تیار رکھیں۔
