اسلام آباد (23 جولائی 2026): بھارت کی جانب سے سلال ڈیم کے تمام آہنی گیٹ کھولنے کے بعد دریائے چناب میں پانی کے بہاؤ میں نمایاں اضافہ ریکارڈ کیا گیا ہے، جس کے باعث پاکستان کے مختلف علاقوں میں سیلابی صورتحال پیدا ہونے کا خدشہ بڑھ گیا ہے۔
محکمہ آبپاشی پنجاب کے مطابق سلال ڈیم سے پانی کے اخراج کے بعد ہیڈ خانکی، قادر آباد اور لہڑی ہیڈ گوگی پر اونچے درجے کا سیلاب ریکارڈ کیا جا رہا ہے، جبکہ ہیڈ مرالہ، بلوکی اور نارووال کے نالہ بسنتر میں درمیانے درجے کی سیلابی کیفیت برقرار ہے۔
ادھر تربیلا، چشمہ، منگلا، نوشہرہ، چینوٹ برج اور نالہ ڈیک میں نچلے درجے کا سیلاب رپورٹ کیا گیا ہے۔ حکام کے مطابق تربیلا ڈیم میں پانی کی سطح 1519.11 فٹ جبکہ منگلا ڈیم میں 1183.90 فٹ ریکارڈ کی گئی ہے۔
محکمہ آبپاشی کا کہنا ہے کہ ہیڈ مرالہ، خانکی، قادر آباد، منگلا، لہڑی اور بلوکی پر پانی کے بہاؤ میں مسلسل اضافہ ہو رہا ہے، جس کے پیشِ نظر متعلقہ اداروں نے ممکنہ ہنگامی صورتحال سے نمٹنے کے لیے پیشگی انتظامات اور حفاظتی اقدامات مزید تیز کر دیے ہیں۔
