خیبرپختونخوا کے 7 لاکھ سرکاری ملازمین نے اپنے مطالبات منوانے کے لیے نومبر میں تمام سرکاری اسکولوں، کالجز اور دفاتر کی تالا بندی کا اعلان کر دیا ہے۔
اس سلسلے میں خیبر پختونخوا کے اگیگا ایسوسی ایشن ملاکنڈ ڈویژن کا مشاورتی اجلاس منعقد ہوا، جو لوئر دیر کے ہیڈ کوارٹر تیمرگرہ میں ہوا، اس میں اگیگا کے صوبائی قائدین نے بھی شرکت کی۔
اجلاس سے اگیگا کے صوبائی چیئرمین وزیر زادہ، صوبائی صدر سمیع اللہ خلیل، ایپکا کے صوبائی صدر محمد سلیم، صوبائی جنرل سیکریٹری معراج علی شاہ، نیاز علی خٹک اور ینگ ٹیچرز ایسوسی ایشن کے صوبائی صدر عطاء الرحمن نے خطاب کیا۔
مقررین کا کہنا تھا کہ صوبائی حکومت کی جانب سے سرکاری اسکولوں اور اسپتالوں کی آؤٹ سورسنگ کی پالیسی غیر دانش مندانہ ہے، جسے اگیگا مسترد کرتی ہے، انھوں نے کہا کہ صوبائی حکومت خیبرپختونخوا کے 7 لاکھ ملازمین کا استحصال کر رہی ہے، مذاکرات کے حوالے سے جو تحریری معاہدے کیے گئے تھے حکومت اس سے پیچھے ہٹ گئی ہے۔
مقررین کا کہنا تھا کہ مرکزی حکومت کے نوٹیفکیشن کے مطابق پنشن، ڈی آر اے اور اپ گریڈیشن کی منظوی دی جائے، انھوں نے درجہ چہارم ملازمین کی ڈیلی ویجز بنیادوں پر بھرتی کا فیصلہ مسترد کیا اور اسے واپس لینے کا مطالبہ کیا۔
