سابق اسپیکر سندھ اسمبلی اور پیپلز پارٹی کے رہنما آغا سراج درانی انتقال کر گئے

کراچی(15 اکتوبر 2025): سابق اسپیکر سندھ اسمبلی اور پیپلز پارٹی کے رہنما آغا سراج درانی 74 سال کی عمر میں انتقال کر گئے ہیں۔
خاندانی ذرائع کے مطابق سابق اسپیکر سندھ اسمبلی آغا سراج درانی کئی روز سے نجی اسپتال میں زیر علاج تھے انہیں عارضہ قلب کے باعث اسپتال میں داخل کیا گیا تھا تاہم آج وہ انتقال کر گئے ہیں۔
واضح رہے کہ گزشتہ ماہ پیپلز پارٹی کے سینئر رہنما و سابق اسپیکر سندھ اسمبلی آغا سراج درانی عارضۂ قلب میں مبتلا ہوئے تھے، خاندانی ذرائع کا کہنا ہے کہ آغا سراج درانی کی میت شکارپور لائی جائے گی۔
صدر مملکت آصف زرداری نے آغا سراج درانی کے انتقال پر گہرے دکھ اور افسوس کا اظہار کیا، صدر مملکت نے آغا سراج درانی کی سیاسی و عوامی خدمات کو خراجِ عقیدت پیش کیا۔
انہوں نے کہا کہ آغا سراج درانی نے جمہوری اقدار کے فروغ میں نمایاں کردار ادا کیا ہے، صدر مملکت نے مرحوم کے اہل خانہ سے دلی ہمدردی اور تعزیت کا اظہار بھی کیا ہے۔