رواں سال کا پہلا سپر مون کب دکھائی دے گا؟

اکتوبر کا مہینہ آسمانی نظاروں کے شوقین افراد کے لیے خاص ہوگا کیونکہ رواں سال کا پہلا پورا چاند جسے سپر مون بھی کہا جاتا ہے، 7 اکتوبر کو دکھائی دے گا۔
پاکستان اسپیس اینڈ اپر ایٹموسفیئر ریسرچ کمیشن (سپارکو) کے مطابق سال کا پہلا سپر مون بروز منگل، 7 اکتوبر کو پاکستان سمیت دنیا بھر میں نظر آئے گا۔
سپارکو کے مطابق سپر مون رات 8:47 بجے مشرق سے طلوع ہو کر مغرب میں غروب ہوگا، یہ عام مکمل چاند کے مقابلے میں 6.6 فیصد بڑا اور 13 فیصد زیادہ روشن دکھائی دے گا۔
سپارکو کا کہنا ہے کہ رواں برس نومبر میں سال کا سب سے روشن سپر مون متوقع ہے، رواں سال 5 نومبر اور 5 دسمبر کو مزید دو سپر مونز نظر آئیں گے، سپر مون کے قریب سیارہ زحل بھی دکھائی دے گا۔
سال کا سب سے روشن سپر مون نومبر میں ہوگا، جب چاند زمین سے 221,817 میل (357,344 کلومیٹر) کے فاصلے پر ہوگا، پاکستان بھر کے آسمانی نظاروں کے شوقین افراد اس نایاب آسمانی منظر کا مشاہدہ کریں گے