کراچی میں پریس کانفرنس کرتے ہوئے ایم کیو ایم پاکستان کے سینئر رہنما ڈاکٹر فاروق ستار نے کہا ہے کہ سندھ میں 6 انتظامی یونٹس کے قیام کی جانب پیش رفت ہونی چاہیے اور صوبے کے وسائل تمام علاقوں میں منصفانہ انداز میں تقسیم کیے جانے چاہئیں۔
انہوں نے کہا کہ کراچی، حیدرآباد، میرپورخاص، سکھر، لاڑکانہ اور دیگر علاقوں کو ترقی کے یکساں مواقع ملنے چاہئیں، جبکہ اختیارات نچلی سطح تک منتقل کرنے سے عوامی مسائل کے حل میں مدد مل سکتی ہے۔
فاروق ستار نے کہا کہ عوام کو یہ حق حاصل ہونا چاہیے کہ وہ انتظامی یونٹس کے قیام سے متعلق اپنی رائے کا اظہار کریں، جس کے لیے شفاف ریفرنڈم بھی کرایا جاسکتا ہے۔ انہوں نے کراچی کے بلدیاتی ملازمین کے ریٹائرمنٹ واجبات کا معاملہ بھی اٹھاتے ہوئے مطالبہ کیا کہ ریٹائرڈ ملازمین کو ان کے واجبات کی ادائیگی یقینی بنائی جائے۔
