گورنر خیبر پختونخوا فیصل کریم کنڈی نے کہا ہے کہ صوبائی پولیس کو کسی سیاسی جماعت کی ’’ٹائیگر فورس‘‘ نہیں بننے دیا جائے گا اور پولیس کو آزاد و خودمختار ادارے کے طور پر کام کرنا چاہیے۔ پشاور میں میڈیا سے گفتگو کرتے ہوئے انہوں نے کہا کہ پولیس کسی کی غلام نہیں، قانون کے مطابق فرائض انجام دینے والا ادارہ ہے اور غلط کام کرنے والے کے خلاف قانون حرکت میں آنا چاہیے۔
فیصل کریم کنڈی نے خیبر پختونخوا حکومت پر پولیس اور محکمہ داخلہ کو سیاسی کنٹرول میں لانے کی کوشش کا الزام بھی عائد کیا۔ ان کا کہنا تھا کہ اگر پولیس ایکٹ 2026 میں کوئی شق آئین یا قانون سے متصادم ہوئی تو وہ اس کا جائزہ لے کر اعتراض کریں گے۔ خیبر پختونخوا کابینہ نے گزشتہ روز مجوزہ پولیس ایکٹ 2026 کی منظوری دی تھی، جس میں پولیس کے انتظامی، مالی اور آپریشنل معاملات سے متعلق اختیارات میں تبدیلیاں تجویز کی گئی ہیں۔
