ایران کے خلاف طویل جنگی کارروائیوں میں مصروف امریکی بحریہ کے طیارہ بردار جہاز ’یو ایس ایس ابراہم لنکن‘ اور اس کے اسٹرائیک گروپ میں تعینات اہلکاروں پر مسلسل جنگی ڈیوٹی کے نفسیاتی اثرات سامنے آئے ہیں۔
امریکی میڈیا رپورٹس کے مطابق اس تعیناتی کے دوران 8 اہلکاروں نے مبینہ طور پر خودکشی کی کوشش کی، تاہم کسی بھی واقعے میں ہلاکت نہیں ہوئی۔ قائم مقام نیوی سیکریٹری ہنگ کاؤ نے سینیٹر کرسٹن گلی برینڈ کے سوالات کے جواب میں بتایا کہ یہ واقعات طیارہ بردار جہاز، اس کے ساتھ موجود ڈسٹرائرز اور فضائی اسکواڈرن کے اہلکاروں سے متعلق ہیں
رپورٹ کے مطابق تقریباً 6 سے 7 ہزار اہلکار چھ ماہ سے زائد عرصے تک مسلسل جنگی تعیناتی اور ہائی الرٹ پر رہے، جس کے دوران انہیں بندرگاہ پر طویل وقفہ بھی نہیں ملا۔ امریکی حکام کے مطابق مسلسل جنگی کارروائیوں اور طویل سمندری تعیناتی کے دباؤ نے اہلکاروں کی ذہنی اور جسمانی صحت سے متعلق تشویش میں اضافہ کیا ہے۔
