تل ابیب: اسرائیل کے انتہا پسند قومی سلامتی کے وزیر اتمر بن گویر نے ایک بار پھر زہر اُگلتے ہوئے کہا ہے کہ جیسے انہوں نے وعدہ کیا تھا بالکل ویسے ہی فلوٹیلا کے شرکا کو جیل میں قید رکھا گیا ہے۔
غیر ملکی ذرائع ابلاغ کے مطابق گزشتہ روز اسرائیل کے انتہا پسند قومی سلامتی کے وزیر اتمر بن گویر نے کیتسعیوت جیل سے ایک ویڈیو جاری کی جہاں فلوٹیلا کے گرفتار کارکنوں کو رکھا گیا ہے۔
اسرائیلی انتہاء پسند وزیر نے ان کارکنان کو ’دہشت گردوں کا حامی‘ قرار دیتے ہوئے کہا کہ ’جیسا میں نے وعدہ کیا تھا، فلوٹیلا کے شرکا اب سکیورٹی جیل میں ہیں اور انہیں دہشت گردوں جیسی ہی حالت میں رکھا جا رہا ہے۔
بن گویر کا کہنا تھا کہ ان کے کپڑے بھی دہشت گردوں جیسے ہیں اور سہولتیں بھی کم سے کم دی جا رہی ہیں۔ یہی میں نے کہا تھا اور یہی کیا جائے گا۔
انتہائی پسند اسرائیلی وزیر نے کہا کہ نیتن یاہو ان کارکنوں کو واپس بھیج کر ’غلطی‘ کر رہے ہیں۔ میرا خیال ہے کہ انہیں چند ماہ کے لیے اسرائیلی جیل میں رکھنا چاہیے۔ اگر کارکنوں کو بار بار واپس بھیجا گیا تو وہ دوبارہ آنے کی ہمت کرتے رہیں گے۔
حماس کے بارے میں ٹرمپ کے مثبت ردعمل سے نیتن یاہو دنگ رہ گئے
واضح رہے کہ اسرائیلی بحریہ نے بدھ کی رات غزہ کے لیے امداد لے جانے والی 42 کشتیوں پر سوار تقریباً 470 کارکنوں کو حراست میں لے لیا تھا۔
اسرائیلی وزارتِ خارجہ کا کہنا ہے کہ اب تک چار کارکنوں کو ملک بدر کیا جا چکا ہے، جبکہ باقیوں کے خلاف ملک بدری کی کارروائی عمل میں لائی جارہی ہے۔
