پی پی اور حکومت کے درمیان ملاقات میں کیا ہوا؟ اندرونی احوال

: پیپلز پارٹی کے وفد کی نائب وزیراعظم اسحاق ڈار سے ملاقات کیسی رہی اس حوالے سے اندرونی احوال سامنے آ گیا۔
رہنما نیوز کے مطابق پیپلز پارٹی کے وفد نے نائب وزیراعظم اسحاق ڈار سے ملاقات کی اور انہیں پنجاب سے متعلق اپنے تحفظات سے آگاہ کیا۔ تاہم ذرائع کا کہنا ہے کہ یہ ملاقات بے سود رہی اور شکایات کے ازالے کیلیے کوئی جامع یقین دہانی نہیں کرائی گئی۔
ذرائع نے بتایا کہ پی پی نے نائب وزیراعظم سے پنجاب میں بلدیاتی الیکشن سے متعلق قانون سازی پر بھی اپنے تحفظات کا اظہار کیا اور اس حوالے سے پی پی کو اعتماد میں نہ لینے کا شکوہ بھی کیا۔
ذرائع کے مطابق پی پی وفد نے دوٹوک کہا کہ نون لیگ کا ہماری جماعت سے بطور اتحادی مشاورت نہ کرنا افسوسناک ہے۔ ہمیں پنجاب پاور شیئرنگ فارمولا پس پشت ڈالنے پر بھی تحفظات ہیں کیونکہ اس فارمولے پر معاملات ایک انچ بھی آگے نہیں بڑھے۔
نائب وزیراعظم نے پی پی کے تحفظات اور شکوے ن لیگ کی قیادت کے سامنے رکھنے کی یقین دہانی کرائی اور دونوں جماعتوں کے درمیان رابطے جاری رکھنے پر اتفاق کیا گیا