پولیس ٹریننگ اسکول پر دہشت گردوں کا حملہ ناکام بنادیا

راولپنڈی : ڈیرہ اسماعیل خان میں پولیس ٹریننگ اسکول پر دہشت گردوں کا حملہ ناکام بنادیا ، جس میں 5 خارجی ہلاک ، امام مسجد اور 6 پولیس اہلکار شہید ہوئے۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا کہ ڈیرہ اسماعیل خان میں پولیس ٹریننگ اسکول پر دہشت گردوں کا حملہ سیکیورٹی فورسز نے بروقت کارروائی کرتے ہوئے ناکام بنا دیا۔
آئی ایس پی آر کا کہنا تھا کہ بھارتی پراکسی فتنہ الخوارج کے حملہ آوروں نے دھماکہ خیز مواد سے بھری گاڑی مرکزی گیٹ سے ٹکرائی تاہم پولیس اہلکاروں کی بروقت جوابی کارروائی میں 3 خارجی مارے گئے جبکہ دو مزید دہشتگردوں کی کمپلیکس میں داخل ہونے کی کوشش بھی ناکام بنا دی گئی۔
ترجمان نے بتایا کہ فائرنگ کے شدید تبادلے میں زیر تربیت اہلکاروں سمیت 6 پولیس اہلکار شہید ہوئے، جبکہ 12 اہلکار اور ایک شہری زخمی ہوئے۔
آئی ایس پی آر نے کہا کہ دہشتگردوں نے حملے کے دوران مسجد کو بھی نشانہ بنایا اور امام مسجد کو سفاکی سے شہید کیا۔
سیکیورٹی فورسز کا علاقے میں خوارج کے خاتمے کے لیے کلیئرنس آپریشن جاری ہے اور قانون نافذ کرنے والے ادارے بھارتی اسپانسرڈ دہشتگردی کے مکمل خاتمے کے لیے پرعزم ہیں، بہادر جوانوں اور شہریوں کی قربانیاں ہرگز رائیگاں نہیں جائیں گی۔