پاسپورٹ بنوانے کے خواہشمند افراد کے لیے بڑی خوشخبری سامنے آ گئی ہے۔ محکمہ پاسپورٹس پاکستان نے پاسپورٹ درخواستوں، پرنٹنگ اور کارکردگی کی مانیٹرنگ کے لیے جدید اور مربوط نظام متعارف کرا دیا ہے۔
محکمہ پاسپورٹس کے مطابق نئے نظام کے تحت اب پاکستان سمیت دنیا بھر میں جمع کرائی جانے والی پاسپورٹ درخواستوں اور ان کی ڈیلیوری کی ریئل ٹائم مانیٹرنگ ممکن ہو سکے گی۔ اس اقدام کا مقصد شفافیت بڑھانا اور پاسپورٹ کے اجرا کے عمل کو مزید مؤثر بنانا ہے۔
ڈی جی پاسپورٹس کی ہدایت پر ہیڈ کوارٹرز میں ایک خصوصی مانیٹرنگ روم قائم کر دیا گیا ہے جو 24 گھنٹے فعال رہے گا۔ ڈیجیٹل انٹیگریٹڈ ڈیش بورڈ کے ذریعے روزانہ کی بنیاد پر آپریشنز کی مانیٹرنگ اور ایویلیوایشن کی جائے گی۔
نئے مانیٹرنگ سسٹم کے تحت پاسپورٹ کے لیے درخواست جمع کرانے سے لے کر پرنٹنگ اور ڈیلیوری تک ہر مرحلے کی نگرانی کی جائے گی۔ اس کے علاوہ پاسپورٹ دفاتر میں رش کی خودکار نشاندہی بھی ممکن ہو گی، جس سے عوام کو بہتر سہولیات فراہم کی جا سکیں گی۔
محکمہ پاسپورٹس کے مطابق اس نظام کے ذریعے اسٹاف کی کارکردگی، پاسپورٹ پرنٹنگ کا عمل، بیک لاگ کی صورتحال اور مشینری اسٹیٹس کی بھی مؤثر نگرانی کی جا سکے گی، جس سے تاخیر اور شکایات میں واضح کمی آنے کی توقع ہے۔
