پاسنگ آؤٹ پریڈ کی شاندار تقریب, کیڈٹس میں انعامات تقسیم

ایبٹ آباد : پاکستان ملٹری اکیڈمی کاکول میں پاسنگ آؤٹ پریڈ کی شاندار تقریب میں فیلڈ مارشل عاصم منیر نے نمایاں کارکردگی دکھانے والے کیڈٹس میں انعامات تقسیم کیے۔
تفصیلات کے مطابق ایبٹ آباد میں پاکستان ملٹری اکیڈمی کاکول میں 152ویں پی ایم اے لانگ کورس کی شاندار پاسنگ آؤٹ پریڈ منعقد ہوئی۔
تقریب کے مہمانِ خصوصی فیلڈ مارشل اور چیف آف آرمی اسٹاف جنرل سید عاصم منیر تھے، ان کی آمد پر حاضرین نے کھڑے ہو کر پرتپاک استقبال کیا، جبکہ فوجی بینڈ نے قومی دُھنیں بجا کر جوش و خروش میں اضافہ کیا۔
فیلڈ مارشل عاصم منیر نے پریڈ کا معائنہ کیا اور نمایاں کارکردگی دکھانے والے کیڈٹس میں انعامات بھی تقسیم کیے۔
فیلڈمارشل سید عاصم منیر نے بابرکمپنی کو قائداعظم ایوارڈ سے نوازا جبکہ نوجوان کیڈٹس نے مارچ پاسٹ کا شاندار مظاہرہ کیا۔
پریڈ میں 152ویں لانگ کورس کے علاوہ 37ویں ٹیکنیکل گریجویٹ کورس، 71ویں انٹیگریٹڈ کورس اور 26ویں لیڈی کیڈٹ کورس کے کیڈٹس نے شرکت کی۔
تقریب میں عراق، یمن، فلسطین اور مالدیپ سمیت مختلف دوست ممالک کے 40 غیر ملکی کیڈٹس بھی شریک ہوئے۔
تقریب میں سول و عسکری شخصیات، غیر ملکی سفارتکاروں اور پاس آؤٹ ہونے والے کیڈٹس کے والدین کی بڑی تعداد نے شرکت کی۔