پاکستان، یو اے ای کو ہرا کر سہ ملکی سیریز کے فائنل میں پہنچ گیا

شارجہ میں کھیلے گئے پانچویں میچ میں پاکستان کی جانب سے دیے گئے 172 رنز کے تعاقب میں یو اے ای کی ٹیم 7 وکٹوں کے نقصان پر 140 رنز بناسکی۔
اوپنر علیشان شرفو کی 68 رنز کی اننگز رائیگاں گئی، کپتان محمد وسیم 12 رنز بنا کر آؤٹ ہوئے۔
ایتھان ڈی سوزا 9 رنز بنا کر نواز کا نشانہ بنے، آصف خان 7 اور راہول بغیر کوئی رن بنائے پویلین لوٹ گئے، ہرشت کوشک 3 رنز بناسکے۔
پاکستان کی جانب سے ابرار احمد نے 4 اوورز میں 9 رنز دے کر 4 وکٹیں حاصل کیں، شاہین شاہ آفریدی اور محمد نواز نے ایک، ایک وکٹ حاصل کی۔
اس سے قبل پاکستان نے مقررہ اوورز میں 5 وکٹوں کے نقصان پر 171 رنز بنائے اور یو اے ای کو جیت کے لیے 172 رنز کا ہدف دیا تھا۔
فخر زمان نے 44 گیندوں پر 77 رنز کی شاندار اننگز کھیلی، ان کی اننگ میں 10 چوکے اور 2 چھکے شامل تھے، محمد نواز بھی 37 رنز بنا کر ناٹ آؤٹ رہے۔
صاحبزادہ فرحان 16 اور صائم ایوب 11 رنز بنا کر آؤٹ ہوئے، کپتان سلمان علی آغا 7 اور محمد حارث 14 رنز بناسکے، حسن نواز کو 4 رنز پر حیدر علی نے آؤٹ کیا۔
یو اے ای کی جانب سے حیدر علی نے دو کھلاڑیوں کو آؤٹ کیا۔
اس سے قبل کپتان سلمان علی آغا نے محمد وسیم الیون کو پہلے بولنگ کی دعوت دی تھی۔
گرین شرٹس میں سفیان مقیم اور حارث رؤف کی جگہ ابرار احمد اور سلمان مرزا کو شامل کیا گیا۔
واضح رہے کہ گزشتہ میچ میں افغانستان نے پاکستان کو شکست دی تھی
سہ ملکی سیریز میں پاکستان نے تین میں سے دو میچ جیتے ہیں اور ایک میچ میں ناکامی کا سامنا کرنا پڑا۔
پاکستان پلیئنگ الیون: سلمان علی آغا کپتان ہیں، دیگر کھلاڑیوں میں صاحبزادہ فرحان، صائم ایوب، فخر زمان، حسن نواز، محمد نواز، محمد حارث، فہیم اشرف، شاہین آفریدی، سلمان مرزا اور ابرار احمد شامل ہیں۔
یوا ے ای پلیئنگ الیون: محمد وسیم کپتان ہیں، دیگر کھلاڑیوں میں آصف خان، علیشان شرفو، راہول چوپڑا، ایتھان ڈی سوزا، ہرشت کوشک، شورو پراشار، حیدر علی، محمد جواد، محمد روحید اور جنید صدیق شامل ہیں