اسلام آباد: ایم کیو ایم پاکستان کے رہنما مصطفیٰ کمال نے کہا ہے کہ کے فور منصوبے کی تکمیل کے باوجود کراچی میں پانی کی فراہمی کا مسئلہ مکمل طور پر حل نہیں ہوگا اور شہریوں کو پھر بھی ٹینکر مافیا پر انحصار کرنا پڑ سکتا ہے۔
قومی اسمبلی کے اجلاس میں اظہارِ خیال کرتے ہوئے انہوں نے کہا کہ کے فور منصوبے پر تقریباً 300 ارب روپے کی لاگت آئے گی جس کے تحت کراچی کو 207 ملین گیلن پانی فراہم کیا جائے گا۔
انہوں نے کہا کہ اصل مسئلہ پانی کی ترسیل کا نظام ہے، کیونکہ لیاری، ڈیفنس، بلدیہ، اورنگی، ناظم آباد اور فیڈر بی ایریا جیسے علاقوں تک پانی پہنچانے کے لیے اندرونی لائنیں بچھانا ضروری ہے۔ ان کے مطابق اگر نئی لائنیں نہ ڈالی گئیں اور پرانی لائنوں میں ہی پانی ڈالا گیا تو ان کی استعداد کم ہونے کے باعث پانی شہریوں تک مؤثر طریقے سے نہیں پہنچ سکے گا۔
مصطفیٰ کمال نے خدشہ ظاہر کیا کہ منصوبہ مکمل ہونے کے باوجود کراچی کے شہریوں کو پانی کے لیے بدستور ٹینکرز پر انحصار کرنا پڑ سکتا ہے۔
