اسلام آباد: پاکستان مسلم لیگ (ن) کی رہنما حنا پرویز بٹ نے ڈرامہ نگار خلیل الرحمٰن قمر کے تیزاب گردی سے متعلق بیان پر شدید ردعمل دیتے ہوئے تنقید کی ہے۔
حنا پرویز بٹ نے سوشل میڈیا پلیٹ فارم ایکس پر ایک ویڈیو شیئر کی، جس میں انہوں نے ڈاکٹر ماہ نور کے حالیہ کیس سمیت تیزاب گردی کے دو واقعات کا حوالہ دیا۔
اپنے کیپشن میں انہوں نے لکھا کہ وہ ایک نجی ٹی وی پروگرام میں شریک تھیں جہاں خواتین کے حقوق پر گفتگو کے دوران تیزاب گردی کا موضوع زیر بحث آیا۔ ان کے مطابق اسی دوران خلیل الرحمٰن قمر کے ریمارکس پر وہ حیران اور پریشان ہو گئیں۔
لیگی رہنما نے دعویٰ کیا کہ خلیل الرحمٰن قمر نے کہا کہ لوگ یوں بات کرتے ہیں جیسے مرد حضرات جیب میں تیزاب کی بوتلیں لے کر نکلتے ہیں۔
حنا پرویز بٹ نے مزید کہا کہ ایسے خیالات رکھنے والے افراد معاشرے کے لیے نقصان دہ ہیں اور اگر انہیں معاملے کی حساسیت کا اندازہ نہیں تو کم از کم خاموش رہنا چاہیے۔ ان کے مطابق تیزاب گردی کی شکار خواتین زندگی بھر کے لیے متاثر ہو جاتی ہیں، مگر بعض رویے اس مسئلے کی سنگینی کو کم ظاہر کرتے ہیں۔
