کراچی: منشیات فروشی کے الزام میں گرفتار انمول عرف پنکی کے موبائل فون کی فارنزک رپورٹ تفتیشی افسر کو موصول ہوگئی، جس میں اہم انکشافات سامنے آئے ہیں۔
ذرائع کے مطابق این سی سی آئی اے کی جانب سے کی گئی فارنزک جانچ کے دوران موبائل فون سے 100 جی بی سے زائد ڈیٹا ریکور کیا گیا۔ برآمد شدہ مواد میں 75 ہزار سے زائد تصاویر اور دیگر امیجز شامل ہیں۔
رپورٹ کے مطابق موبائل فون سے آن لائن مالی لین دین کا ریکارڈ، مختلف کلائنٹس سے وصول کی گئی رقوم کی بینک سلپس کے اسکرین شاٹس اور دیگر اہم دستاویزات بھی حاصل ہوئی ہیں۔
ذرائع کا کہنا ہے کہ فون سے 13 ہزار سے زائد افراد کے رابطہ نمبرز (کانٹیکٹس) بھی ریکور کیے گئے ہیں، جن کا مزید جائزہ لیا جا رہا ہے۔ تفتیشی حکام ڈیٹا کی بنیاد پر کیس کے مختلف پہلوؤں کی چھان بین میں مصروف ہیں۔
