اسلام آباد: وفاقی حکومت اور پاکستان پیپلز پارٹی کے درمیان بجٹ سے متعلق اختلافات سامنے آنے کے بعد پیپلز پارٹی کے چیئرمین بلاول بھٹو زرداری نے قومی اسمبلی میں اپنی بجٹ تقریر احتجاجاً مؤخر کر دی ہے۔
ذرائع کے مطابق پیپلز پارٹی کے سینئر رہنما نوید قمر نے بلاول بھٹو زرداری کو بجٹ صورتحال پر تفصیلی بریفنگ دی۔ بریفنگ میں انہیں آگاہ کیا گیا کہ مشاورت کے دوران حکومت کی جانب سے فراہم کردہ بجٹ تجاویز اور اعداد و شمار اور قومی اسمبلی میں پیش کیے گئے بجٹ میں نمایاں فرق پایا جاتا ہے۔
پارٹی ذرائع کے مطابق پیپلز پارٹی نے ان اختلافات پر حکومت سے فوری وضاحت طلب کرنے کا فیصلہ کیا ہے۔ اس مقصد کے لیے جلد پارٹی کی ایک اعلیٰ سطحی کمیٹی حکومتی نمائندوں سے رابطہ کرے گی تاکہ صورتحال کو واضح کیا جا سکے۔
