پاکستان اسٹاک ایکسچینج میں تیزی کا سلسلہ آج بھی جاری رہا اور مارکیٹ نے نئی تاریخ رقم کر دی، جس کے نتیجے میں کے ایس ای 100 انڈیکس نئی بلند ترین سطح پر پہنچ گیا۔
بازارِ حصص میں کاروباری ہفتے کے دوسرے روز 1030 پوائنٹس کی تیزی کے ساتھ کاروبار کا آغاز ہوا، جس کے بعد کے ایس ای 100 انڈیکس بڑھ کر ایک لاکھ 71 ہزار 772 پوائنٹس کی سطح پر آ گیا۔
واضح رہے کہ گزشتہ روز بھی پاکستان اسٹاک ایکسچینج میں 997 پوائنٹس کے اضافے کے ساتھ مارکیٹ کا آغاز ہوا تھا، جس کے نتیجے میں کے ایس ای 100 انڈیکس ایک لاکھ 70 ہزار 862 پوائنٹس تک پہنچ گیا تھا۔
بعد ازاں مارکیٹ میں اتار چڑھاؤ جاری رہا تاہم مجموعی طور پر 1136 پوائنٹس کے اضافے کے ساتھ کے ایس ای 100 انڈیکس نے پہلی مرتبہ ایک لاکھ 71 ہزار پوائنٹس کی نفسیاتی سطح بھی عبور کر لی۔
ماہرین کے مطابق رواں سال پاکستان اسٹاک ایکسچینج کے لیے غیر معمولی ثابت ہوا ہے، جہاں بینچ مارک کے ایس ای 100 انڈیکس میں تقریباً 40 فیصد اضافہ ریکارڈ کیا گیا ہے، جو خطے کی بیشتر اسٹاک مارکیٹس کے مقابلے میں بہتر کارکردگی ہے۔
