میکسیکو میں ایک چھوٹا طیارہ ہنگامی لینڈنگ کی کوشش کے دوران حادثے کا شکار ہو کر تباہ ہو گیا، جس کے نتیجے میں 7 افراد ہلاک ہو گئے۔
حکام کے مطابق حادثہ سان ماتیو آٹینکو کے صنعتی علاقے میں پیش آیا، جو ٹولوکا ایئرپورٹ سے تقریباً 5 کلومیٹر جبکہ میکسیکو سٹی سے 50 کلومیٹر مغرب میں واقع ہے۔ طیارہ بحرالکاہل کے ساحلی شہر آکاپولکو سے روانہ ہوا تھا۔
اطلاعات کے مطابق طیارہ ایک فٹ بال گراؤنڈ پر ہنگامی لینڈنگ کی کوشش کر رہا تھا کہ اس دوران ایک ویئر ہاؤس کی چھت سے ٹکرا گیا، جس کے باعث طیارے میں شدید آگ بھڑک اٹھی۔
حکام کا کہنا ہے کہ نجی طیارے میں 8 مسافر اور عملے کے 2 افراد سوار تھے۔ حادثے کے بعد امدادی ٹیمیں فوری طور پر موقع پر پہنچ گئیں اور آگ پر قابو پا لیا گیا۔
حکام نے واقعے کی تحقیقات شروع کر دی ہیں جبکہ حادثے کی وجوہات جاننے کے لیے تکنیکی اور حفاظتی پہلوؤں کا جائزہ لیا جا رہا ہے۔
