پاکستان میں سیاحت پائیدار ترقی کا ذریعہ بن سکتی ہے، صدر مملکت

صدر مملکت نے اپنے پیغام میں کہا کہ پاکستان میں سیاحت پائیدار ترقی کا ذریعہ بن سکتی ہے، سیاحت اور پائیدار تبدیلی عالمی یوم سیاحت 2025 کا موضوع قرار دیا گیا ہے۔
آصف علی زرداری نے کہا کہ ماحولیاتی تبدیلی پاکستان کی سیاحتی ترقی کیلیے بڑا چیلنج ہے، گلیشئرز کا پگھلاؤ اور شدید موسمی حالات سیاحتی ورثے کیلیے خطرہ ہے، انتہا پسندی اور عدم برداشت پاکستان کی سیاحت کے فروغ میں بڑی رکاوٹ ہیں۔
انہوں نے کہا کہ سیاحت سے مقامی معیشت کو فروغ، خواتین و نوجوانوں کو بااختیار بنایا جا سکتا ہے، حکومت پاکستان سیاحت کو اقوام متحدہ کے ترقیاتی اہداف سے ہم آہنگ کر رہی ہے، گرین سرٹیفکیشن، کمیونٹی بیسڈ اور ماحولیاتی سیاحت پر توجہ دینے کی ضرورت ہے۔
’سیاحت، امن وہم آہنگی کے فروغ اور ثقافتی ورثے کے تحفظ کا مؤثر ذریعہ ہے۔ پاکستان قدرتی حسن، ورثے اور مہمان نوازی کا حامل ملک ہے۔ سیاحت کے فروغ میں نجی شعبہ، سول سوسائٹی اور نوجوانوں کا کلیدی کردار ادا کر سکتے ہیں۔ پاکستان کو عالمی سیاحتی مرکز بنانے کیلیے سب کو مل کر کام کرنا ہوگا۔