کراچی: اندرون ملک پروازوں کی منسوخی اور بروقت آمدورفت کے معاملے پر پاکستان سول ایوی ایشن اتھارٹی (پی سی اے اے) نے 6 ماہ کی رینکنگ رپورٹ جاری کردی۔
اے آر وائی نیوز کے مطابق پی سی اے اے کی جانب سے جاری کردہ رپورٹ میں یکم جنوری 2025 سے جون 2025 کے دوران پروازوں کی فہرست جاری کی گئی ہے۔
6 ماہ میں اندرون ملک پروازوں کی کم منسوخ میں نجی ایئرلائن فلائی جناح سرفہرست رہی، فلائی جناح کی فلائیٹ ریگولیٹری 95.46 فیصد ریکارڈ کی گئی۔
رپورٹ کے مطابق ایئرسیال دوسرے جبکہ پی آئی اے تیسرے نمبر پر رہی، ایئر بلیو چوتھے اور سیرین ایئر پانچویں نمبر پر رہی۔
اندرون ملک پروازوں کی بروقت آمدورفت میں نجی ایئرلائن ایئر سیال پہلے نمبر پر رہی، فلائی جناح دوسرے، پی آئی اے تیسرے اور ایئر بلیو چوتھے پر رہی۔
سیرین ایئر بروقت آمدورفت کی فہرست میں بھی آخری نمبر پر رہی۔
اس سے قبل پاکستان سول ایوی ایشن اتھارٹی (پی سی اے اے) نے سیرین ایئر کے فلائٹ آپریشنز کو ایوی ایشن سیفٹی ریگولیشنز کی عدم تعمیل کا حوالہ دیتے ہوئے معطل کردیا تھا۔
سی اے اے نے کہا تھا کہ سیرین ایئر مطلوبہ آپریشنل معیارات کو برقرار رکھنے میں ناکام رہی ہے اور فی الحال اس کے پاس ایک بھی ہوائی جہاز سروس کے لیے دستیاب نہیں ہے۔ نتیجے کے طور پر اتھارٹی نے ایئر لائن کو اس کا ایئر آپریٹر سرٹیفکیٹ واپس کرنے کا بھی حکم دیا۔
نوٹیفکیشن میں اس بات کی نشاندہی کی گئی تھی کہ سیرین ایئر کمرشل پروازوں کے لیے لازمی حفاظت اور آپریشنل ضروریات کی مکمل تعمیل کو یقینی بنانے میں ناکام رہی ہے۔
