پاکستان اور آئی ایم ایف کے درمیان مذاکرات ختم ، اسٹاف لیول معاہدہ نہ ہوسکا

پاکستان اور آئی ایم ایف کے درمیان اسٹاف لیول معاہدہ نہ ہوسکا تاہم فریقین نے مزید پالیسی مذاکرات جاری رکھنے پر اتفاق کیا۔
تفصیلات کے مطابق پاکستان اور آئی ایم ایف کے درمیان دوسرے ششماہی اقتصادی جائزہ مذاکرات مکمل ہوگئے، جس کا اعلامیہ جاری کر دیا گیا۔
مذاکرات کے اختتام پر فریقین کے درمیان اسٹاف لیول معاہدہ طے نہ ہوسکا تاہم فریقین نے مزید پالیسی مذاکرات جاری رکھنے پر اتفاق کیا۔
آئی ایم ایف نے قرض پروگرام کی شرائط پر عملدرآمدکومضبوط قرار دے دیا اور پاکستانی معیشت میں استحکام کی کوششوں کوسراہا جبکہ مالی نظم و ضبط برقرار رکھنے اور سیلاب متاثرین کی مدد پر بھی زور دیا گیا۔
اعلامیے میں کہنا تھا کہ مہنگائی کو مقررہ ہدف کے دائرے میں رکھنے کے لیے سخت مالیاتی پالیسی برقرار رکھنے کی سفارش کی گئی، اس کے علاوہ توانائی شعبے کی بحالی، ریگولر ٹیرف ایڈجسٹمنٹ اور اصلاحات پر بھی اتفاق کیا گیا۔
آئی ایم ایف مشن نے مذاکرات کے دوران سرکاری اداروں کے حجم میں کمی، شفافیت میں بہتری، کاروباری ماحول اور کموڈیٹی مارکیٹس کی آزادی سے متعلق اقدامات پر گفتگو کی۔
اعلامیہ میں کہا گیا کہ پاکستان کے ساتھ موجودہ 37 ماہ کے قرض پروگرام اور 28 ماہ کے کلائمیٹ رزیلینس پروگرام پر بھی تفصیلی تبادلہ خیال ہوا۔
آئی ایم ایف نے موسمیاتی تبدیلی سے متعلق ریفارمز کے لیے پاکستان کی کوششوں کو سراہا، جبکہ مشن سربراہ ایوا پیٹرووا نے کہا کہ پاکستان نے کئی شعبوں میں نمایاں پیشرفت کی ہے۔
آئی ایم ایف مشن نے حالیہ سیلاب سے متاثرہ افراد سے ہمدردی کا اظہار بھی کیا اور کہا کہ پاکستان کی معیشت میں استحکام کی کوششیں قابلِ تحسین ہیں