اقوام متحدہ میں پاکستان کا کرارا جواب، بھارت کا مکروہ چہرہ بے نقاب

نیویارک : پاکستان نے ایک بارپھر اقوام متحدہ میں بھارت کا مکروہ چہرہ بے نقاب کردیا اور کہا بھارت اپنے پروپیگنڈے کے ذریعے مقبوضہ کشمیر میں انسانی حقوق کی سنگین خلاف ورزیوں کو نہیں چھپا سکتا۔
تفصیلات کے مطابق اقوام متحدہ میں پاکستان نے ایک بار پھر بھارت کے جھوٹے پروپیگنڈے کا منہ توڑ جواب دے دیا، پاکستانی قونصلر صائمہ سلیم نے بھارتی الزامات کو مسترد کرتے ہوئے کہا کہ بھارت اپنے پروپیگنڈے کے ذریعے مقبوضہ کشمیر میں انسانی حقوق کی سنگین خلاف ورزیوں کو نہیں چھپا سکتا۔
انہوں نے زور دیا کہ بھارت انسانی حقوق کی تنظیموں اور عالمی میڈیا کو مقبوضہ وادی تک رسائی دے تاکہ وہاں کی اصل صورتحال دنیا کے سامنے آسکے۔
پاکستانی قونصلر نے کہا کہ بھارت میں اقلیتیں خوف کے سائے میں زندگی گزار رہی ہیں، جبکہ نئی دہلی کی پالیسیاں جنوبی ایشیا کے امن و استحکام کے لیے خطرہ بن چکی ہیں۔
پاکستانی مندوب نے واضح کیا کہ بھارت سندھ طاس معاہدہ معطل کرکے عالمی قوانین کی خلاف ورزی کر رہا ہے لیکن پاکستان امن، انصاف اور مظلوم کشمیریوں کے حقوق کے لیے ہمیشہ ڈٹا رہے گا۔
دوسری جانب اقوام متحدہ میں پاکستان کے مستقل مندوب سفیر عاصم افتخار احمد نے اپنے خطاب میں کہا کہ سات دہائیوں سے زائد عرصے سے بھارت کے غیر قانونی اقدامات کے باعث کشمیری عوام ظلم و جبر، جبری گمشدگیوں اور خواتین پر جنسی تشدد جیسے مظالم کا شکار ہیں۔
انہوں نے مزید کہا کہ کشمیری عوام بھی فلسطینیوں کی طرح اقوام متحدہ کی ان قراردادوں کے نفاذ کے منتظر ہیں جن میں ان کے حقِ خود ارادیت کی ضمانت دی گئی تھی۔
سفیر عاصم افتخار نے عالمی برادری سے مطالبہ کیا کہ وہ بھارت پر دباؤ ڈالے تاکہ مقبوضہ جموں و کشمیر میں انسانی حقوق کی خلاف ورزیاں بند ہوں اور خطے میں پائیدار امن کی راہ ہموار ہو