باغ: مسلم لیگ (ن) کے رہنما اور وزیراعظم کے مشیر برائے سیاسی امور رانا ثنا اللہ نے کہا ہے کہ پیپلز پارٹی وفاق میں اسی تنخواہ پر کام کرے گی، جبکہ آزاد کشمیر کے مسائل کو حکومت بننے کے بعد ترجیحی بنیادوں پر حل کیا جائے گا۔
آزاد کشمیر کے علاقے باغ میں انتخابی جلسے سے خطاب کرتے ہوئے رانا ثنا اللہ نے کہا کہ پاکستان کشمیر کے بغیر نامکمل ہے اور کشمیر سے پاکستان کا رشتہ کوئی طاقت کمزور نہیں کر سکتی۔
انہوں نے کہا کہ آزاد کشمیر میں مسلم لیگ (ن) کو دو تہائی اکثریت کے لیے مزید 6 نشستوں کی ضرورت ہے۔ ان کا کہنا تھا کہ عوام پاکستان کے اصل مالک ہیں اور کشمیریوں کو ملک میں تمام بنیادی حقوق حاصل ہیں۔
رانا ثنا اللہ نے کشمیر ایکشن کمیٹی کا ذکر کرتے ہوئے کہا کہ اس میں بہت سے لوگ ہمارے بھائی اور محب وطن ہیں، تاہم بعض عناصر کسی کے ایجنڈے پر کام کر رہے ہیں۔
حویلی میں انتخابی جلسے کے بعد میڈیا سے گفتگو میں لیگی رہنما نے پیپلز پارٹی پر تنقید کرتے ہوئے کہا کہ پیپلز پارٹی جہاں سے ہار جائے، وہاں دھاندلی کا الزام عائد کر دیتی ہے۔
انہوں نے مزید کہا کہ آزاد کشمیر میں حکومت بننے کے بعد عوامی مسائل کو ترجیحی بنیادوں پر حل کیا جائے گا۔
