کلفٹن کے علاقے باتھ آئی لینڈ میں اوگرا ڈائریکٹر سندھ جی ایم شاہین سے ہونے والی ڈکیتی کے واقعے کا مقدمہ درج کرلیا گیا۔
تفصیلات کے مطابق شہر قائد میں ڈاکو آج بھی بے لگام ہیں، شہریوں سے چھیا جھپٹی کی وارداتیں کم نہ ہوسکیں، لوگ روزانہ اپنے قیمتی سامان اور نقدی سے محروم کیے جارہے ہیں۔
کلفٹن کے علاقے باتھ آئی لینڈ میں اوگرا ڈائریکٹر سندھ جی ایم شاہین کو لوٹ لیا گیا، واقعے کی سی سی ٹی وی فوٹیج بھی سامنے آگئی۔
اس حوالے سے پولیس حکام کا کہنا ہے کہ اوگرا کے ڈائریکٹر سے ڈکیتی کے واقعے کا مقدمہ ورڈ بیسن پولیس اسٹیشن میں درج کرلیا گیا ہے،
پولیس کی جانب سے واقعے کی مزید تفتیش کی جا رہی ہے اور ملزمان کی گرفتاری کیلیے کارروائیاں جاری ہیں۔
ڈکیتی کا مقدمہ ڈائریکٹر اوگرام غلام محمد شاہین کی مدعیت میں مقدمہ درج کیا گیا، ایف آئی آر کے متن میں کہا گیا ہے کہ 2موٹر سائیکل سوار ملزمان نے موبائل فون چھینے۔
علاوہ ازیں اوگرا ڈائریکٹر سے ڈکیتی کے واقعے کی سی سی ٹی وی فوٹیج بھی سامنے آگئی ہے، ویڈیو میں موٹر سائیکل سوار ملزمان کو واردات کے بعد فرار ہوتے ہوئے دیکھا جاسکتا ہے۔
مدعی مقدمہ نے بتایا کہ انجینئر عون عباس کے ساتھ اوگرا آفس باتھ آئی لینڈ پیدل جارہا تھا، چورنگی پہنچے تو2موٹرسائیکلوں پر سوارملزمان نے موبائل فون اور گھڑی چھین لی، ملزمان کو سامنے آنے پر باآسانی شناخت کرسکتا ہوں۔
