نیٹ فلکس نے اپنے صارفین کے لیے ایک نیا فیچرمتعارف کرادیا

امریکی اسٹریمنگ پلیٹ فارم نیٹ فلکس نے اپنے صارفین کے لیے ایک نیا فیچر متعارف کراتے ہوئے ٹی وی پر ویڈیو گیمز کھیلنے کی سہولت پیش کر دی ہے۔
رپورٹس کے مطابق امریکی اسٹریمنگ پلیٹ فارم نیٹ فلکس کی جانب سے پیش کی گئی اس نئی سہولت کے تحت صارفین اپنے موبائل فون کو کنٹرولر کے طور پر استعمال کرتے ہوئے بڑے اسکرین پر ویڈیو گیمز کھیل سکیں گے۔
بلومبرگ اسکرین ٹائم کانفرنس میں نیٹ فلکس کے شریک چیف ایگزیکٹو گریگ پیٹرز نے اعلان کیا کہ یہ اقدام تفریح کی دنیا میں ایک نئے باب کا آغاز ہے، اور کمپنی ایسے سوشل گیمز تیار کر رہی ہے جنہیں دوست اور اہل خانہ مل کر کھیلیں۔
نیٹ فلکس نے ابتدائی مرحلے میں چند مقبول گیمز کو پیش کیا ہے جن میں بوگل پارٹی، ٹیٹرس ٹائم واؤرپ، پکشنری گیم نائٹ اور لیگو پارٹی شامل ہیں۔
اب صارفین اسمارٹ ٹی وی یا رُوکو جیسے اسٹریمنگ ڈیوائسز کے ذریعے گیم کھیل سکیں گے، جبکہ موبائل کو کنٹرولر کے طور پر جوڑنے کے لیے کیو آر کوڈ اسکین کرنا ہوگا۔

رپورٹس کے مطابق گیمنگ ڈویژن کے سربراہ ایلین ٹاسکن کا کہنا ہے کہ نیٹ فلکس طویل مدتی منصوبہ بندی اور کلاؤڈ سسٹم کو بہتر بنا کر اس شعبے میں اپنی پوزیشن مضبوط کر رہا ہے۔
کمپنی کا مقصد اپنی اسٹریمنگ سروس کو محض فلموں اور ڈراموں تک محدود رکھنے کے بجائے ایک جامع تفریحی پلیٹ فارم میں تبدیل کرنا ہے۔