مشہور قومی بلے باز سے جعلسازی کرتے ہوئے کروڑوں روپے کا فراڈ کر دیا کرکٹر نے سوشل میڈیا پر تفصیل شیر کر دی۔
پاکستان کرکٹ ٹیم کے کھلاڑی دنیا بھر میں اپنی کارکردگی سے ملک کا نام روشن کرتے ہیں، لیکن جعلساز اپنے قومی ہیروز کو بھی چونا لگانے سے نہیں چوکتے۔ ایسا ہی ایک واقعہ مشہور بیٹر کے ساتھ ہوا۔
پاکستان کرکٹ ٹیم کی بیٹنگ لائن میں مڈل آرڈر بلے باز کا کردار کامیابی سے نبھانے والے صہیب مقصود کو کسی غیر نے نہیں بلکہ اپنے وطن میں پاکستانی شہری نے ہی چونا لگا کر لوٹ لیا۔
صہیب مقصود نے اپنے لٹنے کی داستان سوشل میڈیا پر شیئر کر دی، جس میں کرکٹر نے بتایا کہ کار شوروم مالک نے ان سے کس طرح کروڑوں روپے کا فراڈ کیا۔
سماجی رابطوں کی ویب سائٹ ایکس پر صہیب مقصود نے بتایا کہ ان کی ایک کروڑ چالیس لاکھ روپے مالیت کی گاڑی ایک شو روم مالک نے فروخت کر دی، جب کہ اس گاڑی کے اصل کاغذات اب بھی ان کے پاس ہی ہیں۔
قومی بیٹر نے یہ بھی بتایا کہ دھوکے باز شو روم مالک نے انہین بدلے میں ایک ایسی گاڑی دی، جس کے کاغذات بھی جعلی تھی اور اس کے ساتھ ساتھ ان سے مزید 70 لاکھ روپے بھی لے لیے۔
انہوں نے ایک اور پوسٹ میں بتایا کہ 8 ماہ انہیں اپنی گمشدہ گاڑی لاہور کے ایک گھر میں ملی لیکن جب انہوں نے اسے واپس لینے کی کوشش کی تو وہاں موجود شخص نے دعویٰ کیا کہ اس نے گاڑی خریدی ہے اور پولیس بھی اسے واپس نہیں لے جا سکتی۔
کرکٹر نے مذکورہ صورتحال پر افسوس کا اظہار کرتے ہوئے کہا کہ اگر ایک قومی کھلاڑی کے ساتھ یہ فراڈ ہو سکتا ہے تو عام شہری کے ساتھ ایسے لوگ کیا کرتے ہوں گے۔
صہیب مقصود نے وزیراعلیٰ پنجاب مریم نواز، پولیس اور دیگر حکام سے اس واقعہ کی غیر جانبدارانہ تحقیقات کرانے اور ملوث عناصر کو سخت سزا دینے کا مطالبہ کیا ہے
