مٹی کے تیل کی قیمت میں بھی اضافہ

اسلام آباد(یکم نومبر 2025): پیٹرول اور ہائی اسپیڈ ڈیزل کے بعد مٹی کے تیل کی قیمت میں بھی اضافہ کردیا گیا، جس کا نوٹیفکیشن جاری کر دیا گیا ہے۔
وفاقی حکومت نے پیٹرول اور ہائی اسپیڈ ڈیزل کے بعد مٹی کا تیل بھی مہنگا کر دیا ہے، مٹی کے تیل کی قیمت میں 3 روپے 34 پیسہ فی لیٹر کا اضافہ کر دیا گیا ہے۔
مٹی کے تیل کی نئی قیمت 185  روپے 5 پیسے فی لٹر مقرر کی گئی ہے، مٹی کے تیل کی نئی قیمت کا نوٹیفکیشن جاری کردیا گیا، جس کا اطلاق آج سے ہوگا۔
لائٹ ڈیزل آئل بھی 1 روپے 22 پیسے فی لٹر مہنگا کردیا گیا، لائٹ ڈیزل آئل کی نئی قیمت 163 روپے 98 پیسے فی لٹر مقرر کی گئی ہے، نئی قیمتیں آئندہ 15 روز کے لئے نافذ العمل ہوں گی۔

دوسری جانب گزشتہ روز وفاقی حکومت کی جانب سے پیٹرولیم مصنوعات کی قیمتوں میں آئندہ 15 روز کے لیے اضافہ کا اعلان کیا گیا ہے، جس کا اطلاق یکم نومبر سے ہوگا۔
اس حوالے سے نوٹیفکیشن جاری کردیا گیا ہے جس کے مطابق پیٹرول کی قیمت میں فی لیٹر 2 روپے 43 پیسے جبکہ ڈیزل کی قیمت میں 3 روپے 2 پیسے فی لیٹر اضافہ کیا گیا ہے۔
جاری نوٹیفکیشن کے مطابق پیٹرول کی نئی قیمت 265 روپے 45 پیسے فی لیٹر مقرر کی گئی ہے، اس کے علاوہ ڈیزل کی نئی قیمت 278 روپے 44 پیسے فی لیٹر ہوگئی۔
حکام کے مطابق پیٹرولیم مصنوعات کی قیمتوں میں یہ اضافہ عالمی منڈی میں خام تیل کی قیمتوں میں اتار چڑھاؤ کے باعث کیا گیا ہے، تاکہ مقامی نرخوں کو بین الاقوامی رجحانات سے ہم آہنگ رکھا جا سکے۔