مصری صدر اور ڈونلڈ ٹرمپ کے مدعو کرنے پر وزیراعظم کل مصر جائیں گے

دفترخارجہ کا کہنا ہے کہ وزیراعظم کل مصر کا دورہ کریں گے، غزہ کے صورتحال سے متعلق شہباز شریف شرم الشیخ پیس سمٹ میں شرکت کریں گے۔
ترجمان دفتر خارجہ نے بتایا کہ وزیراعظم کو مصری صدر عبدالفتاح السیسی اور امریکی صدر ڈونلڈ ٹرمپ نے مدعو کیا ہے، نائب وزیراعظم، وزیر خارجہ اور دیگر وزرا بھی ہمراہ ہوں گے، شرم الشیخ پیس سمٹ غزہ کی صورتحال کے حل کےلیے منعقد کی جارہی ہے۔
سمٹ یواین جنرل اسمبلی اجلاس پرشروع سفارتی کوششوں کا نتیجہ ہے، وزیراعظم نے 23 ستمبر کو امریکی صدر، 7 عرب اسلامی ممالک کے سربراہان اجلاس میں شرکت کی تھی۔
دفترخارجہ نے جاری بیان میں بتایا کہ عرب اسلامی ممالک نے امریکی صدرکی امن کی کوششوں کا خیرمقدم کیا، عرب اسلامی ممالک نےغزہ میں جنگ بندی، انسانی بحران کے خاتمے کےعزم کا اعادہ کیا۔
ترجمان نے کہا کہ وزیراعظم کی سمٹ میں شرکت فلسطینی عوام کےحق خودارادیت کیلئےپاکستان کی تاریخی حمایت کی عکاس ہے۔
پاکستان کو امید ہے سمٹ مکمل اسرائیلی انخلا اور فلسطینی شہریوں کےتحفظ کا راستہ ہموار کرے گی، پاکستان کو توقع ہے قیدیوں کی رہائی، بےگھرافراد کی واپسی اور غزہ کی تعمیرنو میں پیشرفت ہوگی۔
دفترخارجہ کے ترجمان نے کہا کہ پاکستان کو امید ہے ان کوششوں سے آزاد فلسطینی ریاست کے قیام کی راہ ہموار ہوگی، فلسطین کی خودمختار ریاست 1967 سے قبل کی سرحدوں پر قائم ہونی چاہیے، القدس الشریف کو دارالحکومت کے طور پر قائم ہونا چاہیے