اب حملہ ہوا تو طالبان پوسٹوں کو نشانہ بنائیں گے، پاکستان کا افغان حکومت کو دوٹوک پیغام

پاکستان نے افغان طالبان حکومت کو دو ٹوک پیغام دیا ہے کہ اب حملہ ہوا تو طالبان پوسٹوں کو نشانہ بنائیں گے۔
سیکیورٹی ذرائع کے مطابق پاکستان نے افغانستان کی طالبان حکومت کو دوٹوک پیغام دیا کہ اب ان کی سر زمین سے بلوچستان یا خیبر پختونخواہ میں کوئی دہشتگرد حملہ ہوا تو پاکستان براہ راست طالبان پوسٹوں کو نشانہ بنائے گا۔
سیکیورٹی ذرائع کا کہنا ہے کہ پاکستان نے یہ سرحد پار یہ پیغام بھی دیا ہے کہ جوابی کارروائی میں خارجیوں، ان کی پراکسی کی حمایت کرنے والوں کے اڈوں کو افغانستان کے اندر بھی نشانہ بنایا جائے گا۔
اس واضح پیغام میں افغان طالبان حکومت کو کہا ہے کہ تم دنیا کو نام نہاد ہیرو پن سے متاثر کر سکتے ہو، لیکن پاکستان تمہیں ہر لحاظ سے بہتر جانتا ہے۔
افغان طالبان حکومت کو یاد دلایا کہ پاکستان کی حمایت کے بغیر تم کسی صورت سوویت یونین کو شکست نہیں دے سکتے تھے۔ ساتھ یہ بھی کہا کہ کیا سب بھول گئے کہ تم تورا بورا سے کیسے بھاگے تھے۔
واضح رہے کہ 11 اور 12 اکتوبر کی درمیانی شب افغان طالبان اور بھارتی اسپانسرڈ فتنہ الخوارج نے اشتعال انگیزی کی۔ جس پر پاک فوج کی جوابی کارروائی میں 200 سے زائد طالبان و دہشت گرد ہلاک ہو گئے۔
پاک فوج نے افغان طالبان و خوارج کا حملہ پسپا کر دیا، 200 سے زائد دہشتگرد ہلاک، 23 جوان شہید