اسلام آباد: لانگ مارچ کے پیش نظر وفاقی دارالحکومت کے 24 سرکاری تعلیمی ادارے 22 ستمبر سے بند کرنے کا فیصلہ کیا گیا ہے۔
ذرائع کے مطابق اسلام آباد میں اضافی پولیس نفری کی رہائش کا انتظام سرکاری اسکولوں کی عمارتوں میں کیا جا رہا ہے، جس کے باعث ان اداروں میں تعلیمی سرگرمیاں عارضی طور پر معطل رہیں گی۔
ذرائع کا کہنا ہے کہ اسکولوں کی بندش کے دوران آن لائن تعلیم یا متبادل تعلیمی نظام سے متعلق وفاقی نظامتِ تعلیم کی جانب سے تاحال کوئی پالیسی مرتب نہیں کی گئی۔
واضح رہے کہ جماعت اسلامی اور پاکستان تحریک انصاف نے اسلام آباد کی جانب لانگ مارچ کا اعلان کر رکھا ہے، جس کے باعث دارالحکومت کی مختلف شاہراہوں پر کنٹینرز بھی رکھ دیے گئے ہیں۔
