کراچی میں پریس کانفرنس کرتے ہوئے شرجیل میمن نے کہا کہ سانحہ گل پلازہ کو افسوسناک اور دردناک سمجھتے ہیں، قیمتی جانیں ضائع ہوئی ہیں اس پر ہر آنکھ اشکبار ہے، ہر پاکستانی اس پر افسردہ و غمزدہ ہے۔
وزیر اطلاعات سندھ شرجیل میمن نے گل پلازہ سانحے کو افسوسناک قرار دیتے ہوئے کہا ہے کہ قیمتی جانوں کے ضیاع نے پوری قوم کو غمزدہ کردیا ہے اور حکومت یک نکاتی ایجنڈے پر کام کر رہی ہے کہ لاشوں کو ملبے سے نکال کر ورثاء کے حوالے کیا جائے اور شناخت کا عمل ڈی این اے کے ذریعے جاری ہے۔
کراچی میں پریس کانفرنس کرتے ہوئے انہوں نے بتایا کہ سانحے میں 86 افراد لاپتہ تھے جن میں سے دو اسپتال میں ملے جبکہ باقی کی تلاش جاری ہے، وزیراعلیٰ نے متاثرہ خاندانوں کو ایک ایک کروڑ روپے مالی مدد کی یقین دہانی کرائی ہے۔
شرجیل میمن کے مطابق آگ بجھاتے ہوئے ایک فائر فائٹر شہید ہوا جس کی فیملی سے حکومت اظہارِ یکجہتی کر رہی ہے، واقعے سے متعلق رپورٹ یکم جنوری 2024 کو کمشنر کراچی کو بھیجی گئی تھی اور تحقیقات مکمل ہونے تک کوئی بات کہنا قبل از وقت ہوگا۔
تاجروں کی ایسوسی ایشن کو ایس او پیز پر عمل درآمد کا پابند کیا جائے گا، پورے پاکستان میں 90 فیصد عمارتیں ایسی ہوں گی جو پرانی ہیں، جن میں ایمرجنسی ایگزٹ نہیں ہوگا۔
