کراچی: گلستان جوہر میں تین خواتین کے قتل کے واقعے میں پڑوسی خاتون کا اہم بیان بھی سامنے آگیا ، جس میں بتایا کہ شور شرابہ سن کر دیکھنے پہنچی تھیں کہ ملزم نے چھری کے وار سے زخمی کر دیا۔
تفصیلات کے مطابق کراچی کے علاقے گلستان جوہر بھٹائی آباد میں افسوسناک واقعہ پیش آیا جہاں گھر کے اندر 3 خواتین کو قتل جبکہ 3 افراد زخمی ہوگئے۔
واقعے میں اسپتال منتقل ہونے والی زخمی خاتون مریم نے بھی پولیس کے سامنے بیان ریکارڈ کرا دیا ہے۔
خاتون نے اپنے بیان میں کہا کہ وہ پڑوس میں رہتی ہیں اور شور شرابہ سن کر دیکھنے پہنچی تھیں کہ ملزم اجے نے چھری کے وار سے انہیں بھی زخمی کر دیا۔
مریم کا کہنا تھا کہ گھر میں موجود تمام خواتین کو چھریوں کے وار سے اجے نے ہی قتل کیا۔
پولیس نے کہا کہ ملزم اجے اس وقت تشویشناک حالت میں زیر علاج ہے۔ اسپتال میں ہی دو پولیس اہلکار تعینات کر کے ملزم کو حراست میں لیا جا چکا ہے، صحت یاب ہوتے ہی ملزم کو تھانے منتقل کر دیا جائے گا۔
اس سے قبل واقعے کی واحد کم عمر عینی شاہد زخمی بچی نندنی نے پولیس کو اہم بیان ریکارڈ کرایا تھا۔
ایس ایس پی ملیر نے بتایا تھا کہ بچی نے انکشاف کیا کہ ماموں اجے نے پہلے تینوں خواتین کو قتل کیا اور پھر اسے بھی نشانہ بنانے کی کوشش کی، تاہم وہ بھاگنے میں کامیاب ہوگئی۔
ایس ایس پی ملیر عبد الخالق پیرزادہ نے بتایا کہ بچی کے بیان کے بعد کیس کی صورتحال بالکل واضح ہوگئی ہے، تاہم پولیس کی جانب سے مکمل تحقیقات کی جائیں گی۔
