شہر قائد کے جناح اسپتال کے گائنی وارڈ میں گولی لگنے سے خاتون جاں بحق ہوگئیں۔
پولیس کے مطابق متوفیہ خاتون فہمیدہ کی بیٹی اسپتال میں زیر علاج ہے، خاتون وارڈ کے باہر چہل قدمی کررہی تھی کہ اچانک سینے میں گولی لگی۔
پولیس حکام کا کہنا ہے کہ اسپتال کے باہر دو ملزم ایک دوسرے پر فائرنگ کرتے فرار ہو رہے تھے، اس دوران جناح اسپتال کے گائنی وارڈ میں موجود خاتون کو گولی لگی۔
حکام کا کہنا ہے کہ جناح اسپتال کے باہر رزاق نامی شہری فائرنگ کی زد میں آکر زخمی ہوا، زخمی رزاق مزدور ہے جو چائے پینے ہوٹل کی جانب جا رہا تھا، جاں بحق خاتون فہمیدہ ملیر کی رہائشی تھی، فرار ملزمان کی تلاش جاری ہے۔
دوسری جانب شہر قائد میں پیش آنے والے دو الگ الگ حادثات میں ایک خاتون سمیت دو افراد جان کی بازی ہار گئے۔ ایک واقعہ جیل چورنگی کے قریب پیش آیا، جبکہ دوسرا واقعہ کلفٹن دو دریا کے ساحل پر پیش آیا۔
پہلے واقعے میں جیل چورنگی اسٹاپ کے قریب ایک افسوسناک ٹریفک حادثے میں 45 سالہ خاتون شازیہ جاں بحق ہوگئیں، چھیپا حکام کے مطابق خاتون موٹر سائیکل پر سوار تھیں جب ان کا برقع موٹر سائیکل کی چین میں پھنس گیا، جس کے باعث وہ نیچے گر کر شدید زخمی ہو گئیں
