کراچی: سندھ حکومت نے کل سے کراچی میں ڈبل ڈیکر بس سروس شروع کرنے کا اعلان کر دیا ہے۔ اس حوالے سے صوبائی وزیر اطلاعات و ٹرانسپورٹ شرجیل انعام میمن نے اورنج لائن کو گرین لائن سے ملانے کے منصوبے کا افتتاح کیا اور اورنگی ٹاؤن میں اورنج لائن ڈپو کا بھی جائزہ لیا۔
میڈیا سے گفتگو کرتے ہوئے شرجیل میمن نے کہا کہ یہ پاکستان کی پہلی بی آر ٹی سروس ہے جس میں ایک ہی کارڈ استعمال ہوگا۔ ان کا کہنا تھا کہ اب کوشش کی جائے گی کہ روزانہ ایک لاکھ مسافر اس سروس سے سفر کر سکیں۔
سندھ کے سینئر وزیر نے بتایا کہ گرین لائن اور اورنج لائن کے مسافروں کو اب ڈبل کرایہ ادا نہیں کرنا پڑے گا، بلکہ ایک ہی کارڈ کے ذریعے دونوں لائنوں پر سفر ممکن ہوگا۔
شرجیل میمن نے مزید بتایا کہ کل سے ڈبل ڈیکر بسوں کی سروس شروع کی جا رہی ہے جو کراچی کے عوام کے لیے نئے سال کا تحفہ ہے۔ یہ بسیں ملیر سے شارع فیصل تک چلیں گی اور ان کا کرایہ پیپلز بس سروس کے برابر رکھا گیا ہے۔
انہوں نے کہا کہ فی الحال یہ سروس تجرباتی بنیادوں پر محدود پیمانے پر شروع کی جا رہی ہے، تاہم چیف سیکرٹری سے مشاورت کے بعد مزید ڈبل ڈیکر بسیں شامل کی جائیں گی۔ ان کا کہنا تھا کہ ڈبل ڈیکر بسوں کا بڑا فائدہ یہ ہے کہ اس سے سڑکوں پر ٹریفک کا دباؤ کم ہوگا اور جگہ بچے گی۔
