اداکارہ و ٹی وی میزبان فرح حسین نے کہا ہے کہ انہوں نے بہتر ازدواجی زندگی گزارنے اور بچوں کی پرورش کی خاطر اداکاری سے کنارہ کشی اختیار کی تھی
فرح حسین نے مزاحیہ پروگرام میں شرکت کی، جہاں انہوں نے مختلف معاملات پر تفصیلی گفتگو کی۔
انہوں نے بطور اداکارہ کیریئر کا آغاز کیا تھا لیکن جلد ہی انہوں نے پاکستان ٹیلی وژن پر شو کرنا شروع کردیا۔ جس وقت انہوں نے پی ٹی وی پر مارننگ شو شروع کیا، اس وقت اور بعد میں بھی کافی وقت تک نجی چینلز پر مارننگ شوز کا رجحان نہیں تھا۔
ان کی کم عمری کی وجہ سے انہیں متعدد بار مارننگ شو کی میزبانی کے لیے مسترد کیا گیا لیکن بلآخر انہیں شو کرنے کا شرف حاصل ہوا اور دیکھتے ہی دیکھتے ان کا شو مقبول ہوگیا۔
ایک سوال کے جواب میں اداکارہ نے کہا کہ زندگی خدا کی جانب سے انسان کو عطا کیا گیا سب سے خوبصورت تحفہ ہے، ہر لمحے، ہر سانس اور ہر دن کو خوبصورت تحفہ سمجھ کر گزارا جانا چاہیے۔
وہ سنجیدہ طبیعت کی مالک ہیں اور سنجیدہ شخصیت رکھنے کی وجہ سے وہ خود کو خوش قسمت بھی تصور کرتی ہیں۔ سنجیدہ طبیعت ہونے کا مطلب یہ ہوتا ہے کہ آپ کو دوسروں کے درد کا احساس ہے لیکن جس دن کسی کو کسی کی تکلیف کا احساس ہونا بند ہوگیا، اس دن وہ شخص کسی کام کا نہیں رہتا۔
یک طرفہ محبت کے سوال پر ان کا کہنا تھا کہ انہوں نے کبھی یک طرفہ محبت نہیں کی، تاہم ان کا خیال ہے کہ ایسی محبت بے وقوفی ہوتی ہے۔
اداکارہ نے کہا کہ محبت ایک سے زائد بار بھی ہوسکتی ہے لیکن ایک وقت میں ایک ہی شخص سے محبت ہوسکتی ہے۔
انہوں نے خصوصی طور پر لڑکیوں کو مشورہ دیا کہ وہ شادی کا فیصلہ اپنے والدین کی رضامندی کے بغیر نہ کریں، وہ والدین پر اپنی شادی کا فیصلہ مسلط نہ کریں۔
فرح حسین کا کہنا تھا کہ لڑکوں کو بھی والدین کی رضامندی سے ہی شادی کرنی چاہیے، اگر کوئی محبت کی شادی بھی کرتا ہے تو وہ والدین کی رضامندی سے کرے۔ انہوں نے کہا کہ والدین کی صورت میں ہر شخص کو خدا ملتا ہوتا ہے، والدین بہت بڑی نعمت ہوتے ہیں۔
انہوں نے بہتر شادی شدہ زندگی گزارنے اور بچوں کی پرورش کی خاطر اداکاری کو چھوڑا تھا۔
