اسرائیلی وزیر دفاع اسرائیل کاٹز نے فلسطینی مزاحمتی تنظیم حماس کی بیرون ملک موجود قیادت کو پھر سے دھمکی دے دی۔
قطری نشریاتی ادارے الجزیرہ کی رپورٹ کے مطابق اسرائیل کاٹز کی حماس قیادت کو دھمکی ایک ایسے وقت میں سامنے آئی جب اسرائیل نے غزہ جنگ بندی معاہدے کی خلاف ورزی کرتے ہوئے غزہ پر شدید حملے کیے جس میں 100 سے زائد فلسطینی شہید ہو چکے ہیں۔
اسرائیلی فوج نے غزہ میں اہم اہداف کو نشانہ بنانے کا دعویٰ کرنے کے بعد جنگ بندی معاہدے پر دوبارہ عمل درآمد شروع کرنے کا اعلان کیا ہے۔
دوسری جانب اسرائیلی وزیر دفاع نے اپنے بیان میں کہا کہ حماس کی قیادت میں کسی کیلیے کوئی استثنیٰ نہیں، نہ سوٹ پہننے والوں کیلیے اور نہ ہی سرنگوں میں چھپنے والوں کیلیے، جو کوئی اسرائیلی فوجیوں کے خلاف ہاتھ اٹھائے گا اس کا ہاتھ کاٹ دیا جائے گا۔
اسرائیل کاٹز نے دعویٰ کیا کہ اسرائیلی فوجی یونا ایفرائیم فیلڈبام کی ہلاکت کے بعد منگل کو حماس کے درجنوں مزاحمت کاروں کو نشانہ بنایا، غزہ میں بنیادی ڈھانچے کے درجنوں اہداف کو بھی نشانہ بنایا گیا۔
