اسرائیل کے لیے جاسوسی کے الزام میں موساد کے ایجنٹ کو پھانسی

تہران(20 اکتوبر 2025): ایران نے معافی مسترد ہونے کے بعد اسرائیل کے لیے جاسوسی کے الزام میں موساد کے ایجنٹ کو پھانسی دے دی۔
ایرانی میڈیا کے مطابق ایرانی کی صوبائی عدلیہ کے سربراہ سید کاظم موسوی نے کہا کہ موساد سے وابستہ ایک جاسوس کو پھانسی دے دی گئی ہے، یہ جون میں دونوں ممالک کے درمیان 12 دن کی جنگ کے بعد سزائے موت کی تازہ ترین کارروائی ہے۔
ایرانی عدلیہ کے مطابق قم صوبے کے چیف جسٹس کاظم موسوی نے کہا کہ اس جاسوس کی سزا سپریم کورٹ کی توثیق اور قم جیل میں اس کی معافی کی درخواست مسترد ہونے کے بعد نافذ کی گئی۔
کاظم موسوی کے مطابق مجرم کو ملک میں فساد پھیلانے اور تباہی مچانے کے الزامات میں سزا سنائی گئی تھی، جسے سپریم کورٹ نے برقرار رکھا اور رحم کی اپیل مسترد کردی گئی۔
انہوں نے بتایا کہ مجرم نے اکتوبر 2023 میں صہیونی حکومت کی انٹیلی جنس ایجنسی موساد کے ساتھ تعاون کا آغاز کیا تھا اور فروری 2024 میں گرفتار کیا گیا۔
ایرانی میڈیا کا کہنا ہے کہ مکمل انٹیلی جنس تحقیقات، شواہد کی فراہمی اور مجرم کے اعتراف کے بعد یہ ثابت ہوا کہ وہ صہیونی ویب سائٹس کو معلومات فراہم کررہا تھا، مجرم پر موساد کے افسر سے خفیہ تعاون، جاسوسی اور حساس معلومات کی ترسیل کے الزامات تھے۔