لاہور: پولیس نے لاکھوں روپے مالیت کی پتنگوں کی بڑی سپلائی ناکام بناتے ہوئے ملزم کو گرفتار کرلیا ، ملزم پتنگوں کی سپلائی لوکل ٹرانسپورٹ کے ذریعے کیا کرتا تھا۔
تفصیلات کے مطابق لاہور میں شفیق آباد پولیس نے کارروائی کرتے ہوئے 250 پتنگوں کی غیر قانونی سپلائی ناکام بنا دی اور 250 سے زائد رنگ برنگی پتنگیں ضبط کر لیں۔
ایس پی سٹی بلال احمد نے بتایا کہ گرفتار ملزم اظہر محمود پابندی کے باوجود شہر کے مختلف علاقوں میں پتنگ فروشی میں ملوث تھا، یہ کارروائی پتنگ بازی کے خلاف جاری خصوصی مہم کا حصہ تھی۔
پولیس حکام کا کہنا ہے کہ ملزم پولیس کی کارروائیوں سے بچنے کے لیے پتنگوں کی سپلائی لوکل ٹرانسپورٹ کے ذریعے کیا کرتا تھا۔
ایس پی بلال احمد نے ایس ایچ او شفیق آباد اور سب انسپکٹر سہیل کی بروقت کارروائی کو سراہا اور کہا کہ پتنگ بازی، خرید و فروخت اور تیاری پر مکمل پابندی برقرار ہے، خلاف ورزی کرنے والوں کے خلاف سخت کارروائی عمل میں لائی جائے گی۔
پولیس نے ملزم کے خلاف مقدمہ درج کرکے تفتیش شروع کر دی ہے تاکہ نیٹ ورک کے دیگر افراد کو بھی گرفتار کیا جا سکے۔
