وزیراعلیٰ سندھ مراد علی شاہ نے کہا ہے کہ عوام کا تحفظ، انصاف کی فراہمی اور قانون کی خلاف ورزی کرنے والوں کو قانون کے مطابق کارروائی کا سامنا کروانا پولیس فورس کی بنیادی ذمہ داری ہے۔
سعید آباد پولیس ٹریننگ سینٹر میں 132ویں پاسنگ آؤٹ پریڈ کی تقریب سے خطاب کرتے ہوئے وزیراعلیٰ سندھ نے کہا کہ آج 300 سے زائد خواتین نے بھی اپنی تربیت مکمل کی ہے، جس پر انہیں خوشی ہے۔ انہوں نے کہا کہ ایک نیا تربیت یافتہ دستہ عوام کی خدمت کے لیے تیار ہے اور شہریوں کو پُرامن ماحول فراہم کرنا اب ان کی ذمہ داری ہے۔
مراد علی شاہ نے کہا کہ ملک کو دہشتگردی سمیت مختلف چیلنجز کا سامنا رہا ہے، جبکہ پولیس اہلکاروں نے امن و امان کے قیام کے لیے بڑی قربانیاں دی ہیں۔ انہوں نے کہا کہ کچے کے علاقوں میں درپیش مسائل پر قابو پانے کے لیے اقدامات جاری ہیں اور شہداء کی قربانیاں رائیگاں نہیں جائیں گی۔
وزیراعلیٰ سندھ کا کہنا تھا کہ پولیس کی کارکردگی بہتر بنانا اور اہلکاروں کی فلاح و بہبود سندھ حکومت کی ترجیحات میں شامل ہے۔ انہوں نے امید ظاہر کی کہ پاس آؤٹ ہونے والے اہلکار فیلڈ میں جا کر سندھ پولیس کا نام مزید روشن کریں گے۔
انہوں نے مزید کہا کہ پولیس اپنی بہترین کارکردگی کے ذریعے عوامی اعتماد اور ادارے کے تشخص کو بہتر بنا سکتی ہے، جبکہ سندھ حکومت پولیس فورس کو جدید تقاضوں کے مطابق مضبوط بنانے کے لیے پرعزم ہے۔
