بالی ووڈ اداکار سلمان خان نے طلبہ کے احتجاج کی حمایت کرتے ہوئے تعلیمی نظام میں اصلاحات کا مطالبہ کیا ہے۔
سوشل میڈیا پلیٹ فارم ایکس پر جاری بیان میں سلمان خان نے کہا کہ یہ تحریک ابتدا میں پُرامن تھی، تاہم بعد میں اس کا پرتشدد رخ اختیار کرنا افسوسناک ہے۔ انہوں نے احتجاج کے دوران متاثر ہونے والے طلبہ اور ان کے اہلخانہ کے ساتھ ہمدردی کا اظہار کیا۔
سلمان خان کا کہنا تھا کہ پیپر لیک کا معاملہ ایک سنگین مسئلہ ہے اور یہ خوش آئند ہے کہ طلبہ بہتر تعلیمی نظام کے لیے متحد ہو کر سامنے آئے، جبکہ والدین نے بھی ان کا بھرپور ساتھ دیا۔
انہوں نے طلبہ کی محنت، عزم اور مستقبل بہتر بنانے کی خواہش کو سراہتے ہوئے کہا کہ ان کی جدوجہد ایک زیادہ تعلیم یافتہ اور ترقی یافتہ بھارت کی تعمیر کی جانب قدم ہے۔
بالی ووڈ اسٹار نے زور دیا کہ اس معاملے کو سیاسی رنگ دینے کے بجائے طلبہ اور تعلیمی نظام سے متعلق مسئلے کے طور پر دیکھا جانا چاہیے۔ انہوں نے امید ظاہر کی کہ حکومت طلبہ کے مسائل کے حل اور تعلیمی نظام کو مضبوط بنانے کے لیے اقدامات کرے گی۔
