اسلام آباد میں بلدیاتی انتخابات ایک بار پھر تاخیر کا شکار ہونے کا خدشہ بڑھ گیا ہے، جبکہ وفاقی کابینہ نے مقامی حکومتوں سے متعلق ترمیمی آرڈیننس لانے کا فیصلہ کر لیا ہے۔
وزیراعظم شہباز شریف کی زیر صدارت وفاقی کابینہ کے اجلاس میں اسلام آباد کیپیٹل ٹیریٹری لوکل گورنمنٹ ترمیمی آرڈیننس 2025 سے متعلق کابینہ کمیٹی برائے قانون سازی کے فیصلوں کی توثیق کر دی گئی۔ اجلاس میں فیصلہ کیا گیا کہ مقامی حکومتوں کے قانون میں ترمیم کے لیے آرڈیننس جاری کیا جائے گا۔
وفاقی کابینہ کے اجلاس میں آف گرڈ لیوی سے متعلق بجلی تقسیم کار کمپنیوں کے صارفین کو ریلیف دینے کی حکمت عملی کی بھی منظوری دی گئی۔ کابینہ نے آف گرڈ لیوی ایکٹ 2025 میں ترمیم کے لیے صدارتی حکم نامہ جاری کرنے کی کارروائی کی بھی توثیق کر دی۔
اجلاس کے اعلامیے کے مطابق وزیراعظم شہباز شریف نے پی آئی اے کے 75 فیصد حصص کی کامیاب نجکاری پر اظہارِ اطمینان کیا۔ وزیراعظم نے کہا کہ حکومت سنبھالتے ہی یہ فیصلہ کر لیا گیا تھا کہ خسارے میں چلنے والے تمام سرکاری اداروں کی نجکاری کی جائے گی، جو حکومت کے معاشی اصلاحات کے ویژن کا حصہ ہے۔
وزیراعظم نے رواں مالی سال کی پہلی سہ ماہی میں جی ڈی پی میں خاطر خواہ اضافے کو خوش آئند قرار دیتے ہوئے کہا کہ حکومت نے ملک کو ڈیفالٹ کے خطرے سے نکال کر معاشی استحکام کی جانب گامزن کیا ہے۔
