خیبر پختونخوا کے ضلع لکی مروت میں ناورخیل موڑ کے قریب دہشتگردوں نے نجی سیمنٹ فیکٹری کی بس پر حملہ کر دیا۔ پولیس کے مطابق دہشتگردوں نے بس کو آئی ای ڈی دھماکے کے ذریعے نشانہ بنایا، جس کے نتیجے میں ایک شخص جاں بحق جبکہ دو خواتین سمیت 9 افراد زخمی ہو گئے۔
پولیس کا کہنا ہے کہ دھماکے کے فوراً بعد امدادی کارروائیاں شروع کی گئیں اور تمام زخمیوں کو قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے۔ زخمیوں میں بعض کی حالت تشویشناک بتائی جا رہی ہے۔
واقعے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے جبکہ سکیورٹی کو مزید سخت کر دیا گیا ہے۔ پولیس کے مطابق حملے کی تحقیقات جاری ہیں اور دہشتگردوں کی گرفتاری کے لیے مختلف پہلوؤں سے شواہد اکٹھے کیے جا رہے ہیں۔
