مصر میں غزہ جنگ بندی مذاکرات کے دوران حماس کے اہم مطالبات سامنے آگئے۔
ترجمان حماس فوزی برہوم کے مطابق مستقل اور جامع جنگ بندی ہمارا پہلا مطالبہ ہے۔
اسرائیلی فورسز کا غزہ سے مکمل انخلا ہمارا دوسرا مطالبہ ہے۔
غزہ میں انسانی امداد کی بلا روک ٹوک فراہمی تیسرا مطالبہ ہے۔
بے گھر افراد کی اپنے گھروں کو واپسی ہمارا چوتھا مطالبہ ہے۔
فلسطینی قومی تکنیکی ادارےکی نگرانی میں مکمل تعمیرنو کا فوری آغاز پانچواں مطالبہ ہے۔
قیدیوں کا منصفانہ تبادلہ اور معاہدہ ہونا چھٹا مطالبہ ہے۔
ترجمان نے کہا کہ نیتن یاہو مذاکرات ناکام بنانےکی کوشش کر رہے ہیں کیونکہ اسرائیل کبھی غزہ میں فتح حاصل نہیں کرپائےگا۔
امریکی صدر ڈونلڈٹرمپ کے غزہ منصوبے پر مصر میں حماس اور اسرائیل میں بالواسطہ مذاکرات شروع ہو گئے ہیں۔
غیرملکی خبر ایجنسی کے مطابق شرم الشیخ میں ہونے والے آج مذاکرات میں اسرائیلی اور امریکی وفود شرکت نہیں کریں گے۔ آج حماس اور ثالث ممالک کے درمیان گفتگو کے بعد امریکی و اسرائیلی وفود کو آگاہ کیا جائے گا۔
ان مذاکرات کا مقصد صدرٹرمپ کے منصوبے کے ذریعے جنگ کےخاتمے پر پیشرفت ہے اور امریکی صدر نے مذاکرات کو تیز رفتار اور نتیجہ خیز بنانےکی ہدایت کی ہے۔ امریکی صدر کے مطابق مذاکرات کاپہلامرحلہ اسی ہفتے مکمل ہونا چاہیے۔
الجزیرہ ٹی وی کے مطابق منصوبے میں کئی اہم نکات کی تفصیلات غائب ہیں جس میں حماس کے غیرمسلح ہونے کا کوئی واضح وقت یا طریقہ نہیں بتایا گیا اور فلسطینی ریاست کے قیام کی مبہم شق نے دونوں جانب تشویش بڑھادی ہے
